Erakusketak

Ainize Sarasola. Ultraindarkeriak / Ultraviolence

E-posta Inprimatu

Ainize Sarasola. Ultraindarkeriak / Ultraviolence

Ainize Sarasolak (Orio, 1984) arte plastikoen arloan garatu du bere ibilbidea. Batez ere hiru esparru artistikoetan mugitzen da: pintura, collagea eta marrazkia, eta azken ingurune horretan garatu du gehien bere praktika artistikoa.

2021ean  Egile Saria jaso zuen

Ultraindarkeriak / Ultraviolence erakusketak, Ainizeren lanak 70. hamarkadako genero literario erromantiko eta misteriozkoarekin -pulp generoarekin- duen lotura agerian  jartzen duen  marrazki lagina biltzen du eta bere prozesu eta teknikan barrena eramaten gaitu. Bai kontzeptu-mailan, bai teknika, euskarri eta lengoaia artistikoen aniztasun-mailan; erotismo erromantikoaren eta artistaren agresibitate bikainaren arteko marra gorri mehe eta sotila agerian uzten du erakusketa honek.

Gainera, eta erakusketa honetarako, Katixa Agirre idazleak site specific lan baten  sorkuntzan parte hartu du, “maitasun erromantikoaren” kontzeptu hedatuaren ingurruan bost literatur pilua sortuz. Bost testu hauek, egoera eta paisaia gogoangarrietara eramaten gaituztenak, eta gaur egungo kontzeptuei lotutako eszenak planteatzen dizkigute; indarkeria matxistarekin, bakardadearekin, polimaitasunarekin, teknologiekin, zaintzarekin eta, azken batean, erromantizismoaren paradigma estandar eta ezarritakoen gainean hausturak nabarmenduz.

Testuak, ehunezko piezetan interpretatu ditu gero Ainize Sarasolak eta idazlearen testuekin batera pieza bakarra osatzen dute.

Gero, Ainize Sarasolak ilustratutako ehun-piezetan interpretatu dira testuak, eta idazlearen testuekin batera pieza bakarra osatzen dute.

Ganbara, 3. solairua
Ekainaren 16tik uztailaren 9a arte
Asteartetik ostiralera: 16:00 / 20:00
Larunbatetan: 11:00 / 14:00

 

 

Gari Arambarri. Tentsioak eta bestelako paisaia emozional batzuk

E-posta Inprimatu

Gari Arambarri. Tentsioak eta bestelako paisaia emozional batzuk

Tentsioak eta beste paisaia emozional batzuk izeneko erakusketak tentsio formal eta emozionalen munduan murgiltzen da, arte garaikidetik eta instalazio artistikotik abiatuta. Gari Aranbarri Azkoitiko artistak (1997) erakusketa hau aurkezten du ekainaren 11ra arte Koldo Mitxelena Kulturuneko Ganbara aretoan.

Erakusketan, Ite deu lana ikus daitekie, sormen artistikoaren kategorian Egile 2021 saria jaso zuen bideosorkuntza. Super 8an grabatu eta ondoren digitalizatutako pieza da eta, halaber, bere sorkuntza prozesuak hainbat formatutan hurbiltzen dituzten lanak biltzen ditu. Arambarrik site-specific instalazio bat egin du, bere tentsioak eta Ganbara espazioaren tentsioak uztartzen dituena.

Ganbara, 3. solairua
Maiatzaren 19etik ekainaren 11 arte
Asteartetik ostiralera: 16:00 / 20:00
Larunbatetan: 11:00 / 14:00

 

Irati Cano Alkain. China Girls

E-posta Inprimatu

Irati Cano Alkain. China Girls

Erakusketa Irati Cano Alkainek EQZEn 2018tik 2019ra egin duen ikerketa prozesura hurbiltzea da. Erakusketaren pieza nagusietako batek, Medusak film laburrak, Gipuzkoako Foru Aldundiko Kultura Departamentuaren Egile 2021 saria jaso du.

Irati Cano Alkainek Txina Girls kontzeptua esploratu du, hainbat jatorritako emakumeekin fotogramak sortuz. Genero estereotipoekin eta rolekin jolasten du; orain emakume batek begiratzen du eta emakume bat da emakumeok atzematen dituena. Horrela, irauli egiten da fotograma horiek atzemateko modu originala eta begirada (gizonezkoena, «teknikoa»). Ikus-entzunezko katalogazioko eta artxiboko hizkuntza tekniko espezifikoa hurbiltzen digu.

Ganbara, 3. solairua
Apirilaren 21etik maiatzaren 14a arte
Asteartetik ostiralera: 16:00 / 20:00
Larunbatetan: 11:00 / 14:00

 

Menchu Gal. Margotzeko bizi, bizitzen margotu

E-posta Inprimatu

MENCHU GAL ORENDAIN

(Irun, 1919-2008)

Aurten, Gipuzkoako margolari aparteko honen jaiotzaren mendeurrena ospatzen da. Paisaia eta, neurri txikiagoan erretratua eta natura hilak dira ospea eman zioten generoak, eta bertan garatu zuen hain erakargarri zitzaion kolorearen erakarpen pertsonala.Lortutako sari ugarien artean 1959an Espainiako Pintura Sari Nazionala jaso zuen, emakume bati lehen aldiz emandakoa, 2005ean Gipuzkoako Foru Aldundiaren Urrezko Domina, 2006an Eusko Ikaskuntzaren Manuel Lekuona saria eta Irungo Udalaren Urrezko Domina.
“Nola arnastu, hala margotzen zuen Menchu Galek: sakon, egoki eta azkar. Amédée Ozenfanten, Daniel Vázquez Díazen eta Benjamín Palenciaren dizipulu izana, Vallecaseko Eskolara atxikia eta Euskal Herrian lotura ugari izandakoa, Aurelio Arteta eta Montes Iturrioz tarteko. Kubismoaren eta espresionismo fauvistaren eragina jasotakoa, Nafarroako, Euskadiko eta Gaztelako paisaiak, erretratuak eta natura hilak dira haren obraren ardatza; Menchu kolorearen emozioa eta poza da, eta XX. mendeko emakumezko margolari esanguratsuenetako bat María Blanchardekin, Carme Laffontekin eta Maruja Mallorekin batera” (Edorta Kortadi).

“Parisko Eskolaren balio modernoetan sakontzen jarraitu zuen, fauvismoaren, kubismoaren, abstrakzioaren eta nolabaiteko surrealismoaren konkista formalei uko egin gabe” (Francisco Calvo Serraller).

“Menchu Galek berdearen freskotasuna eman zion Madrilgo Eskolari, eta Kantauri aldeko itsasoaren urdina” (Benjamín Palencia).

“Menchu Galek zalantzan jarri zuen bere obraren balioa bizitzaren azkenera arte” (Edorta Kortadi).

ERAKUSKETA
Ganbara, 3. pisua
2019/07/17 – 2019/09/28
Asteartetik larunbatera
11:00-14:00 / 16:00-20:00

 

Santos Bregaña. Disparaître

E-posta Inprimatu

120 hitz Santosi buruz labur aritzeko. Jada badaramatzagu sei eta oraindik ez dugu ezer esan. Beharbada azken hitz horiek laburbilduko lukete haren obra hobekien: ezer ez. Horixe ikusiko duzu, hain zuzen ere, hemendik aurrerako orrialdeetan: ezereza. Horregatik desagertzen da edo horregatik praktikatzen du desagertzearen aldrebeskeria, ikusgarriago bihur dadin bere ezerezak uzten dion hutsarte horretan bertan. Ezerez ederra, adjektibo bat baliatuz hitzak xahutu nahi badugu –idaztera goazen hauekin 70 badaramatzagu jada, ez da urrun izango 77.a, eta ziur artistak oso gustuko izango duela jolas hori, hitz bat haren ezerezaren neurriko zenbaki eder bat bihurtzea–. Testua ugaritzen ari da, eta definizioei tartea egiteko garaia da, bukatu aurretik: desagertzea bi aldiz egotea da; horixe egiten du Santosek bere lantegian sortzen dituen obra/nahasmen horietan guztietan. Barkatu, aurrerantzean testua marratu behar dut, hitzaurrea idazteko jarri zidaten 120 hitzeko muga gainditu baitugu. Baina hor dago gakoa, hain justu, agindua bete ez eta hitzak desager daitezen eragitean; bizi duten paradoxa horretan, artistaren obrak bezala, ez egoteari esker presenteago egon daitezen. Irakurtzen ari zaren hau ere ez dago jada. Egon zen, baina desagertu egin da gero, oraindik ere jakin-min handiagoz irakurtzea ahalbidetzen duen marra baten atzean: paradoxa bat, esan dugunez. Santos, jakin gabe ere, Silvestre Paradoxeko protagonista balitz bezala dabil; ez dut obra hori ezagutzen, baina jakin badakit hari jarraitzen diola. Guztia da biratzen, guztia da iraultzen… Testu marratuaren barruan nahi beste luza gaitezkeenez gero, zera esango dugu: guztia da buruz behera jartzen, guztia da behekoz gora jartzen. Jatetxe batek zeruan du itsasoa; beste batek, berriz, buru gainean jartzen dizkigu kai muturreko arroka handiak. Erretilu batek ez du eusten, igo egiten du; lata batek barruan gordetzen du bere burua irekitzekoa. Zergatik ez dago ezer bere lekuan Santosen unibertso ilustratuan? Batzuetan minimoa irudi lezake egiten duen birak: zerraldo bateko kristoa arropa esekitoki bihurtzen du (hor lehenengo bira), eta errudun zigortu bat balitz bezala hormara begira jartzen du (hemen bigarren bira)… Biek ala biek osotasun bat biltzen dute: Kristoren begirada gure begiradatik ezkutatzea. Minimoa dirudien keinu horretan daude Santosek irakurri dituen liburu guztiak eta Santosek egin dituen ibilaldi guztiak eta Santosek arnastu dituen paisaia guztiak. 347 hitz, horien artean 228 marratu. Jarrai dezagun lasai, inor ez baitago hemen benetan, inork ez gaitu ikusten. Desagertzen den hori leku ona da egoteko. Aspaldiko arrats batek ematen duen bakean eserita bagina bezala. Biratzeaz ari ginen hizketan, gauzei buelta emateaz. Josep Plak miretsi egiten zuen dortoka bat ezinezko egoera batean ikusteko ahoz gora uzten duen zakurraren ironia… Askozaz ere lehenago, Nadar handiak aurrez aurreko erretratu bat egin zion bera bizi zen gizarteari, baina salbuespen bat egin zuen dama eder batekin, haren garondo biluzia baino ez baitzuen erakutsi… Argi dago: ez dago arterik ifrentzutik harago, eta Laia lantegiko nahasmen horretan sekula ere ez diegu gauzei begirik ikusten. Hain justu horregatik sentitzen dugu bizitasun handiagoz haien begirada. Begirada, 464. hitza izan da hori. Beste zenbat gehiago idatziko ote ditugu? Zein izango ote da 578. hitza? Amaituko ote dugu 999. hitza egin aurretik? Oraingoz, gure lainozko lubakitik kanpo gera ez daitezen, jar ditzagun idatziz obra hauetan oso presente dauden zenbait hitz: arintasuna (508), eta, harengandik oso hurbil, sorginkeria (514). Bi hitz biki: anafora (519) eta anabasia (522). Bakar bat salbatu beharko bagenu, ordea, glissade (530) hitza salbatuko genuke, hark baino ez baitu merezimendu nahikorik letra etzanez idatzia izan, eta Voltaireren hizkuntzan lerratzeko, lerratzen den gisan Santosen gurpil ohola letra zizelkatuzko gurpilekin, hiri urrun bat putzuz putzu zeharkatzen duelarik, asfalto gainean bertso iragankorrak idazteko. Ikusten? Berriz ere, iragankorra asfalto gainean. Bira egiteari utzi gabe, paradoxan sartu gara berriro, betiere sorginkeriaren atetik. Baina, isilik, dena kontatzea ere ez da eta komeni, utz diezaiogun hutsarte bat isiltasunari, desagertzearen erreinuko beste errege horri. Saia gaitezen sarrera honi 777. hitzarekin amaiera ematen, lehen ere inoiz aipatua dugunez gero 77.a, aurrekoaren alaba gazteena izan daitekeen hitza. Orain hasiko dugun lerro berri honekin idatzi ditugu jada 636 hitz; beste 141 falta zaizkigu, beraz. Aski izango dira, beste bi hauek ere hemen idatziz jartzeko: magia eta espazioa. Santosengan dagoen guztia hori baita azken buruan: egoteko lekuak sortzea. Borobila, Entomhotel… horra hor beste bi bira itzel. Lehena, gure hilak itzul daitezen, sagarren bitartez gugan bizi izatera. Bestea, berriz, haren intsektu maite kutunek (beti Paradoxekin batera doan Silvestre hori bezala) teilape bero bat eta izara finak izan ditzaten eskura… Baina kontuz ibili gero! Sartuak gara dagoeneko 710. hitzaren lerroan, eta tentuz egin behar dugu aurrera, ez baitugu ahotsa alferrik galdu behar, gure azken hitza izan dadin zolitasun betekoa, desagertzen ari den hitzaurre hau ixtearen bakardadea merezi duen bakarra, Santosek bere armiarma sareetan harrapatu, eta azkena emateko titulu gisa funtzionatzen duen hitz horixe bera, zuk gustura baina horizontea non duen argi kokatu gabe irakurriko duzun liburu honetan hizpide den guztia bezala.

 

EZEREZA

Oskar Alegria

 

 


1/29 orrialdea
Hau ere online
  • Iván Zulueta

    Sailkatu ezinezko artista baten sorkuntzaren erreferentzia osoa eta oinarrizkoa.

  • Txiki Zabalo

    Kronika grafikoaren eredu eta ilustratzaile den horren lan grafikoaren bilduma osoa.

  • Pío Baroja

    Donostiar idazle handia irakurtzeko gida.

  • Antiqva

    Aintzinari buruz orain arte egin diren jardunaldietako testuak.

  • XIX. mendeko albuma

    Euskal Herriari buruzko 4.000 irudi inguru dituen kultur webgunea. Irudiak Gipuzkoako Foru Aldundiaren funtsetakoak dira eta kultur zentro desberdinetan daude.

  • Alfonso Sastre - Eva Forest

    Alfonso Sastre eta Eva Forest-en inguruko informazio osoa.

  • Gabriel Celaya

    XX. mendeko Gipuzkoako poetarik esanguratsuenetarikoaren bizitzari eta lanari errepasoa.

  • Gipuzkoa 1936

    Garaiko dokumentuak, egunkari eta bestelako aldizkako argitarapenak, erabiliz Gipuzkoa eraldatu zuen urtearen errealitatea erakusten da.

  • Manex Erdozaintzi

    Manex Erdozaintzi-Etxart XX. mendeko euskal olerkari aipagarrienetako bat da, 1934-1984 urteen artean bizi izan zena. Euskal pentsamenduarekin lotutako artikulu eta gogoeta anitz idatzi zuen.

Cerrar

Erabalitzaileen nabigazioaren analisia egiteko gure cookie-ak eta bitartekoenak erabiltzen ditugu. Nabigatzen jarraitzen baduzu, hauen erabilpena onartzen duzula hausnartzen dugu.
Hemen konfigurazioa aldatu edo informazio gehiago lortu dezakezu.